Özbəkistan və Cənubi Koreya süni intellekt nəqliyyatı, Orta Dəhlizin inkişafını müzakirə edirlər

BAKI, Azərbaycan, 22 oktyabr. Oktyabrın 21-də Cənubi Koreyada keçirilən görüşdə Özbəkistan və Cənubi Koreya süni intellekt əsasında hərəkətin idarə edilməsi, yol təhlükəsizliyi və dəmir yolu nəqliyyatı üzrə əməkdaşlığı, eləcə də Orta Dəhlizin tranzit potensialının gücləndirilməsi imkanlarını müzakirə ediblər.

Bu, Cənubi Koreyanın Qanqneunq şəhərində keçirilən İntellektual Nəqliyyat Sistemləri (ITS) üzrə Ümumdünya Konqresi çərçivəsində Özbəkistanın nəqliyyat nazirinin müavini İlxomjon Abduqafarov ilə Cənubi Koreyanın torpaq, infrastruktur və nəqliyyat nazirinin müavini Conq Eui-gyeong arasında keçirilən görüşdən sonra Özbəkistan Nəqliyyat Nazirliyinin bəyanatında əksini tapıb.

Tərəflər avtomobil yollarının idarə olunması, yol təhlükəsizliyi və real vaxt rejimində nəqliyyat axınının monitorinqi və təhlili sahəsində əməkdaşlığı nəzərdən keçiriblər.

İntellektual svetoforların və süni intellekt əsasında hərəkətin idarə edilməsi həllərinin potensial tətbiqinə xüsusi diqqət yetirilib. Bu texnologiyalar nəqliyyat axınını yaxşılaşdırmağa, sıxlığı azaltmağa və yol təhlükəsizliyini artırmağa kömək edə bilər.

Bundan əlavə, rəsmilər dəmir yolu nəqliyyatı sahəsində beynəlxalq əməkdaşlığı müzakirə ediblər. Cənubi Koreya Özbəkistana ölkənin Dəmir Yolları arasında Əməkdaşlıq Təşkilatının (DƏƏT) fəaliyyətində iştirakı və təşkilata qəbulu ilə bağlı verdiyi dəstəyə görə təşəkkür edib.

Bundan başqa, Cənubi Koreya Özbəkistanla Orta Dəhlizin inkişafı, onun tranzit imkanlarının artırılması, nəqliyyat və logistika infrastrukturunun təkmilləşdirilməsi və marşrut boyunca potensial birgə infrastruktur layihələrinin həyata keçirilməsində işləməyə hazır olduğunu bildirib.